|
VLM-Maskenprämierung beim 4. Tattüü
am Rüüdig Samschtig 25.02.2017 im Hotel Continental-Park
TATTÜÜ Lozärner Fasnacht of de Bühni |
|
Eröffnig med ere Parde vo de prämierte Maske ond Süsches zor Bühni
Moderator Wisel Häcki
Es isch für eus Lozärner Maskefründe en grossi Freud, nach ere Pause vo 40 Johr, wieder en Maskeprämierig dure-zfüere und das i eusem 90 Johr Jubiläum. Mir send sehr erfreut vo dene super-schöne Maske und Süsches.
Es härzlichs Dankeschön a Kurt Erne und Lotti Studer, sie hend med grossem Ufwand das 4. Tattüü organisiert ond zom Glück au gueti Sponsore gfunde. >> www.tattüü.ch/Sponsoren
Erfreulech isch au, dass s'Tattüü sed ere Woche med 210 Sitzplätz usverkauft esch.
Uf Prämierig dömmer eus zäme med em VLM-Liedli istimme:
Mier Maskefründe (Melodie 'Es Buurebüebli', Text VLM)
Es stu-urs Büebli mag i need, das gseht mer mier wohl a, juhe
so fideli Gsichter mag i scho, das gseht mer mier wohl a.
Fiderie fidera, fiderallala, fiderallala, fiderallala,
so schöni Maske mag i scho, das gseht mer mier wohl a.
S mues eini si-i gar hübsch und fit, darf kei Bequemi si, juhe
mier Maskefründe hübsch ond fit, wo schöni Maske hend.
Nach füre ond hindre, nach rächts ond links,
noch ufe ond abe, nach rächts ond links.
Prämierig vo de beschte Maske und Süsches
I de Jury send als neutrali ond unbestächlichi Priisrischter drü langjährige Mitglieder vo de Lozärner Maskefründe: Erica Wüst, Hans Wüst und Christoph Hoesly.
Im 3. Rang isch diä 10-er Gruppe 'Gäderzäpfli (Halszäfpli) med em Motto Bärgstieger belohnt med emene Guetschin vom Stadtkäller ond emene Karton Wi, gspändet vo Weinbau Ottiger, Kastanienbaum.
Schöne Dank an Toni ond Ursula Ottiger, wo als Floriste verkleidet wunderschöni Blueme verteilt hend.
Im 2. Rang isch äs Duo med em Süsche Fuultier. sie gwünnid en Reise-guetschin vo 300 Franke, gspändet vo de Gössi Carreisen AG, Horw
Im 1. Rang vo de Einzelmaske wird s'Süsche Regulierigswahn prämiert
ond gwünnd en Winterzauber uf em Pilatus för 2 Persone med ere Bahnfahrt,
em Nachtässe ond ere Übernachtig im Wärt vo 400 Franke, gspändet vo de Pilatus Bahnen AG, Kriens
Au im 1. Rang uszeichnet wird 3-er Gruppe med em Süsche Zuehörer.
Sie gwünned en Reiseguetschin vo 500 Franke, gspändet vo de Gössi Carreisen AG, Horw
Gönner ond Sponsore
Mer danket allne Gönner ond Sponsore vo de VLM, wo die Maskeprämierig unterstützt hend.